Bandhkam Kamgar Scholarship Yojana : मंडळी महाराष्ट्रातील अनेक कुटुंबांचा उदरनिर्वाह बांधकाम कामगारांच्या रोजच्या श्रमावर चालतो. या कष्टकरी वर्गातील मुलांना चांगले शिक्षण मिळावे आणि त्यांच्या पालकांची आर्थिक अडचण थोडीफार का होईना, कमी व्हावी, यासाठी महाराष्ट्र सरकारने एक उपयुक्त योजना सुरू केली आहे बांधकाम कामगार शिष्यवृत्ती योजना. ही योजना Maharashtra Building and Other Construction Workers Welfare Board (MAHABOCW) मार्फत राबवली जाते.
या योजनेचा उद्देश काय आहे?
शासनाच्या या योजनेचा मुख्य हेतू म्हणजे बांधकाम कामगारांच्या मुलांना शिक्षणासाठी आर्थिक मदत करणे. जे कामगार मंडळावर नोंदणीकृत आहेत, त्यांना त्यांच्या मुलांच्या शिक्षणासाठी दरवर्षी शिष्यवृत्ती दिली जाते. या योजनेमुळे अनेक मुलांना शिक्षणात सातत्य ठेवता येते आणि पालकांवरचा खर्चाचा ताणही कमी होतो.
शिष्यवृत्ती मिळवण्यासाठी कोण पात्र आहे?
शिष्यवृत्ती मिळवण्यासाठी अर्जदार बांधकाम क्षेत्रात काम करणारा आणि महाराष्ट्र इमारत व इतर बांधकाम कामगार कल्याणकारी मंडळावर नोंदणीकृत असणे आवश्यक आहे. तसेच त्याचा/तिचा मुलगा किंवा मुलगी शाळा किंवा महाविद्यालयात शिकत असावा. जर पत्नी शिक्षण घेत असेल, तर तिच्याही नावाने शिष्यवृत्ती मिळू शकते.
शिष्यवृत्तीसाठी लागणारी कागदपत्रं
ऑनलाईन अर्ज करताना काही महत्त्वाची कागदपत्रं अपलोड करावी लागतात. यामध्ये विद्यार्थ्याची 75% उपस्थिती दर्शवणारे प्रमाणपत्र, शाळेचे बोनाफाईड सर्टिफिकेट, आधार कार्ड, स्वयंघोषणापत्र आणि कुटुंबाचा शिधापत्रिका (राशन कार्ड) यांचा समावेश होतो. ही सर्व कागदपत्रं स्कॅन करून ठेवणे गरजेचे आहे, जेणेकरून अर्ज करताना वेळ वाचेल.
अर्ज कसा करावा?
शिष्यवृत्तीसाठी अर्ज करायचा असल्यास, तुम्हाला https://mahabocw.in/ या अधिकृत वेबसाईटवर जावे लागेल. वेबसाईट उघडल्यानंतर Apply Online for Claim हा पर्याय निवडावा. त्यानंतर New Claim वर क्लिक करून तुमचा 14 अंकी नोंदणी क्रमांक टाका आणि मागितलेली सर्व माहिती भरावी व कागदपत्रे अपलोड करावीत. सर्व काही भरल्यानंतर अर्ज सबमिट करा. यानंतर तुम्हाला एक पोचपावती क्रमांक मिळेल, जो भविष्यासाठी सुरक्षित ठेवावा.
कोणत्या इयत्तेसाठी किती रक्कम मिळते?
या योजनेअंतर्गत मिळणाऱ्या शिष्यवृत्तीची रक्कम विद्यार्थ्याच्या इयत्तेनुसार वेगळी असते. इयत्ता 1वी ते 7वी पर्यंत दरवर्षी ₹2,500, तर 8वी ते 10वीसाठी ₹5,000 शिष्यवृत्ती मिळते. जर विद्यार्थी 10वी किंवा 12वीमध्ये 50% किंवा त्यापेक्षा अधिक गुणांनी उत्तीर्ण झाला असेल, तर ₹10,000 मिळू शकतात. जर कामगाराची पत्नी शिक्षण घेत असेल, तर तिलाही ₹20,000 पर्यंत शिष्यवृत्ती मिळू शकते. याशिवाय, वैद्यकीय शिक्षण घेणाऱ्या विद्यार्थ्यांना दरवर्षी ₹1,00,000, तर अभियांत्रिकीसाठी ₹60,000 पर्यंत अनुदान दिले जाते.
नोंदणी का गरजेची आहे?
अनेक वेळा ग्रामीण भागातील बांधकाम कामगारांना या योजनेबद्दल माहिती नसते किंवा नोंदणीची प्रक्रिया माहित नसते. त्यामुळे ते या योजनांचा लाभ घेऊ शकत नाहीत. म्हणूनच, जर तुम्ही बांधकाम क्षेत्रात काम करत असाल, तर MAHABOCW वर नोंदणी करणे ही पहिली आणि आवश्यक पायरी आहे. नोंदणी झाल्यावरच तुम्ही शिष्यवृत्तीसह इतर ३० पेक्षा जास्त योजनांचा लाभ घेऊ शकता.
बांधकाम कामगारांसाठी शासनाकडून चालवल्या जाणाऱ्या योजना त्यांच्यापर्यंत पोहोचणे हे तितकेच महत्त्वाचे आहे. त्यामुळे जर तुमच्या ओळखीत अशा कुटुंबातील कोणी असेल, तर त्यांना याबद्दल नक्की सांगा. शिक्षणाचा प्रकाश सर्वदूर पोहोचण्यासाठी ही छोटी मदत फार मोठी ठरू शकते.
